يوميات مسودن \ تلفونات الربع

تلفونات الربع !!

الساعه 9 صباحا .....
هو: الو
انا: هلا
هو: السلام عليكم
انا: هلاااااااااا عليكم السلام والرحمة هلا بالطش والرش (ولىىىىى هذا شذكرة فيني شعندة داق على هالحزة)
هو: هلا فيك يالدحمي ,شلونك شخبارك
انا: والله بخير دامك بخير عاش من سمع هالصوت (قلبي يرقع واحاول اهيئ نفسي للحجي اللى بيقولة)
هو:عاشت ايامك بعد جبدي
انا: يبة الجلب اللى عضك ذبحناة , عسى ماشر لاحس لاخبر لاتتصل , ياخي قدر انى اكبر منك بالعمر يعني انت المفروض تدق على اخوك شوفة ميت حي شفية مافية (مجاملة بايخة)
هو: ادري ان مقصرين قلبي بس تدري يخوي الدنيا ومشاغلها
انا: اى الله يعينك ان شاء الله (من قلبي كانت الدعوة)
هو: اقول حجي ...
انا: قول حجى (اىىىىى اطلع وبان عليك الامان)
هو: حجي ترا مو ناسيك كلمتلك واحد امس يعرف مسؤل التوظيف بالغانم وكلمة عنك ووعدة بخيرن شاء الله (والله انة طيب انة مو ناسيني ومكلمة امس بس!!)
انا: الله يرحملى والديك مشكووووور وماتقصر والله ماتدري شكثر محتاج للوظيفة خص هاليومين بعيد عنك الحالة تعبانة , مكسورة وماتبرد والله (بصراحة فجر فيني بركان من الامل وحب الحياة ولا الانسة صفاء في لحن الحياة )
هو: ولو ماسويا شي اخو عزيز
انا: بعد ي تسلم (معقولة بيسكر الخط اللحين وهذى سالفتة)
هو: اقول الدحمي , ماعندك ستين دينار سلف لاخر الشهر( اىىىى قلت مو لله)
انا: هااا .. والله يخوي شقولك , ماعندي اللحين لكن بحاول ادبرلك بس اصبر على هاليومين (خاف اقولة ماعندي يفركش سالفة الوظيفة هذا اذا ماكان قاص على فيها من الاساس)

**

الساعه 2 ظهرا ..........
هو:هلا حجي وينك
انا: هلا فيك عسى ماشر شفيك تلهث ( الله يستر)
هو: وينك خلصني ..
انا: ويني بعد بالبيت ( الله يستر اكيد متهاوش ويبيني اطب معاة ... الفزعه الفزعه !!)
هو: زين بسرعه تعالى ..
انا: شفييييييك ؟؟ تحجي متهاوش ؟؟
هو: ويني ووين الهواش انت الثاني انا زين واقف على حيلى تعال خلصني سيارتى واقفة , جيب الاشتراك معاك مو تنسى ..
انا: زين حجي , وين واقف؟
هو: بعد ماتنزل من برج الساعه جنك رايح حولى , تلقانى مبسط على اليسار
انا: يالله يايك (وامري لله)

**

الساعه 7 ليلا ...
هو: السلام عليكمممممممم هلا صديقي
انا: هلا والله عمري ,شخبارك ( كنت سعيد بتلفونة صراحة , هو صديقي الوحيد الحقيقي)
هو: تمام تمام , وينك فية (اكرة هالكلمة واتوقع انى بطلق مرتي المستقبلية ان سالتني اياها)
انا: والله ماكو قاعد اتمشى على الممشي ضايق خلقي شوي .. حياك
هو: لا وين حياني , انا طالع ووياي الربع شرايك نمرك (هييييييييييااا)
انا: وين رايحين ؟
هو: والله ماقررنا لكن بنهيت شوية باحد هالمجعات يمكن نروح الافنيوز السينما (افااا انا وين وهالمكان وين , الافنيوز دخلتة مرتين بحياتي مجموع الوقت اللى قضيتة بهالمرتين ماتعدي العشر دقاق , والسينما عمري ماطبيتها جو الظلامة ودار مادارك ناس مادانية)
انا: والله ودي لكن شكلى بعيد عنك يخرع لاحالق ولا متزقرت , روحوا انتو ان شاء الله اليايات اكثر ( والله كان ودي اروح اغير جو صراحة )
هو: (بعد الحاح طويل منة ورفض قاطع مني ) يالله عيل نشوفك على خير
انا: وانت من اهله , سلم على الربع فيمالله

**

الساعه 10 ونص ليلا ....
هو: الله بالخير
انا: الله بالنور هلا بهالصوت ( كنت مستغرب اتصالة شيبي هذا)
هو: هلا فيك يالورد , شلونك شخبارك
انا: والله الحمدلله تمام
هو:حجي ادق عليك ادق عليك .. طوط طوط طوط ( مادق على عقبها)

**

الساعه 12 ليلا …
هو: السلام عليكم
انا: هلا هلا حجي عليكم السلام والرحمة
هو: لايكون نايم ( نقدت عليه بس انا ماستحي قلتها له ...).
انا: والله انك ضايع.. زين افرض انى نايم صج وبسابع نومة واني قاعد احلم بحلم وردي .. بعد بتلفونك هذا حتى لو نايم بتقعدني ( مدري ليش صاير ماحشم احد).
هو :اااه لا عيل اسف ادق عليك مرة ثانية .
انا: لايخوووي اتغشمر , مو نايم قاعد ادرس عندي امتحان بالمعهد باجر.
هو: اى الله يوفقك .
انا: امرني حجي مو العادة تدق هالحزة (بشوف شسالفة هالمكالمة )
هو: مايامر عليك عدو يخوي بس فقدتك الفترة الى طافت قلت ادق اسلم .
انا: يبعد عمري والله انك راعي الاولة صراحة وتسوالك عشيرة كاملة (صدمني صراحة انة فاقدني , معقولة اكو ناس جذي تحب في الله ولله)
هو: شكرا شكرا , بعد اخبار علوم
انا: والله ابد تسلم وتدوم ماكو شي مهم
هو: يخوي نبي نشوفك , ابي اقعد معاك في سالفة شاغلتنى وابي رايك (اىىىى هني الحجي)
انا: عيوني لك اجيك اللحين , خوفتني والله (اول شي مر على قلت بيفتح موضوع هجرتة للخارج الولد من فترة يتهدد على هالشي)
هو: لا وين تجيني خلها باجر , ادق عليك ونتواعد ولاتحاتي ترا الموضوع عادي
انا: على خير اللى تشوفة عيل وعدنا باجر ( وخلاها تقرقع بقلبي )

كانت تلك نماذج من تلفونات الربع ليوم امس